Elbasy Joldaýy T.Júrgenov atyndaǵy Qazaq ulttyq óner akademııasynyń keńeıtilgen májilisinde de qyzý talqylandy. Bolashaq óner mamandaryn ázirlep otyrǵan oqý ordasynda Joldaý baǵyttaryna oraılastyrylǵan «Adamı kapıtal: ıntellektýaldy ult qalyptastyrýdyń rýhanı negizderi» atty respýblıkalyq ǵylymı-tájirıbelik konferensııa ótti.
Konferensııada T.Júrgenov atyndaǵy Ulttyq óner akademııasynyń rektory Bıbigúl Núsipjanova «Adam kapıtaly – memleket damýynyń basty faktory» atty baıandamasynda búkil álem elderiniń ónerkásiptik revolıýsııa dáýirine qadam basqanyn, jańa tehnologııalyq ómir saltynan qazaqstandyqtardyń da tysqary turmaıtynyn, sanaǵa túbegeıli ózgeristiń qajettiligi týyndaǵanyn atap ótti. «Jahandyq ózgeristerdi qabyl ala otyryp, «Qazaqstan-2050» damý Strategııasyn, ozyq damyǵan otyz eldiń qataryna qosylý maqsatyn jáne «100 naqty qadam» Ult josparyn damyta otyryp, «Sıfrly Qazaqstan» keshendik baǵdarlamasyn qabyldaýǵa basa nazar aýdarylǵany bolashaqqa jarqyn jol ashady», dedi Bıbigúl Nurǵalıqyzy.
Sondaı-aq konferensııaǵa qatysqan fılosofııa ǵylymdarynyń doktory, professor Murat Sábıtuly da «Rýhanı jańǵyrýdyń» mádenı-áleýmettik, tarıhı tanymdyq negizdemeleri týraly» degen baıandamasy arqyly joǵary oqý orny men ǵylym úshin qajetti tetikter týraly sóz etti. «Joldaý óner salasynda básekege qabiletti jastar tárbıeleýmen aınalysatyn bizdiń ujymnyń professorlyq-oqytýshylar quramyna da úlken serpilis berip otyr», dedi.
Konferensııaǵa qatysqan ǵalymdar ındýstrııalandyrý, jańa tehnologııalardy engizý, sonyń ishinde sıfrlandyrýǵa baılanysty ózindik oı, tyń usynystarymen bólisti. Ekonomıkany sıfrlandyrý elimizge tabys ákelgenimen, óndiriste jumys kúshi azaıyp qalǵan jaǵdaıda eńbek naryǵynda paıda bolatyn keleńsiz túıtkildi ońtaıly sheshý joldaryn sóz etti. Jas býyn HHI ǵasyrdyń tabıǵı resýrstarǵa muqtaj ǵasyr ekendigin eskere otyryp, ony únemdi ári maqsatty paıdalanýdy úırenip ósse ıgi. О́ıtkeni qoǵamnyń óndiristik damýyna baılanysty adamnyń tabıǵatqa áseri, tabıǵat baılyǵyn, tabıǵat kúshterin paıdalanýy da artyp keledi. Ǵylymı-tehnıkalyq jetistikterdiń damýy qorshaǵan ortadaǵy úılesimdi shıelenistirmeýi tıis.
Jańa kezeńge laıyq tolyqqandy adam týrasynda tolǵamdy oı bildirgen mamandar bilim berýdiń jańa sapasyna qol jetkizý úshin bul saladaǵy ózimizdiń ozyq júıemizdi qurýdy jedeldetý qajet degen túıin jasady.
Aıgúl AHANBAIQYZY,
«Egemen Qazaqstan»
ALMATY
